"ولادي خربوا بيتي".. أب يمتنع عن الإنفاق على أبنائه بعد الطلاق لهذا السبب
وقفت الأم أمام محكمة الأسرة وقال: عيالي مالهمش ذنب، بيجوعوا وبيتحرموا من أبسط حقوقهم علشان أبوهم عايز يعاقبهم ويعاقبني، ابني الكبير كان سبب في إن حياتي تتقلب، بس مش بذنب منه، هو أنقذني من خيانة كانت بتحصل وأنا مش واخدة بالي.
امتناع الأب عن الإنفاق على أولاده
وكانت السيدة تقدمت بدعوى نفقة صغار أمام محكمة الأسرة، تطالب فيها بإلزام طليقها بالإتفاق على طفليها، 15 عامًا و8 سنوات، بعدما امتنع والدهما عن الإنفاق منذ وقوع الطلاق.
الإبن رأى صور غريبة على تليفون والده
وتضيف الزوجة، الولد لقي رسائل غريبة على تليفون أبوه، وشاف صور ومكالمات بينه وبين ست تانية، ولما واجهه قاله مايتدخلش في اللي مالوش فيه، لكن الولد جري عليا وقالي كل حاجة، واجهته وساعتها ما أنكرش، وقال إن دي حياته وإنه حر، وفضلت مستحملة علشان العيال، بس بعد كده بقينا كل يوم في خناقة، ومع كل لحظة حسيت إن كرامتي بتموت قدام عيني، وقررت أطلب الطلاق.
حرمان الأبناء من حقوقهم في الحياة
وتابعت: من يوم ما اتطلقنا وهو رافض يصرف على العيال، بيقول إنهم سبب في خراب بيته، وإنهم اختاروا يقفوا معايا، مع إنهم ولاده، ومن وقتها وأنا شايلة الحمل لوحدي، وبشتغل أي حاجة علشان أوفر لهم لقمة يأكلوها، لكن خلاص مش قادرة، هو موظف ودخله كويس، ومش من حقه يحرمهم من حقوقهم علشان كرامته المجروحة.
وأنهت: «الولاد ليهم حق يعيشوا حياة كريمة، يتعلموا ويتعالجوا ويلبسوا زي باقي الأطفال، وأنا مش قادرة أوفر ده لوحدي، علشان كده بطالب بحقهُم في النفقة».
موضوعات ذات صلة
